შოთა ჩანტლაძე - ო, მე არც თუ ისე...

ო, მე არც თუ ისე ცუდად ვარ მოსილი,

დავდივარ ქუჩაში, დავდივარ მძიმედ და...

შემხვდება ვიღაცა მთლად ჩამოძონძილი

და დამცინავად გაეღიმება.

ო, მე არც თუ ისე მახინჯი გახლავართ,

დავდივარ ქუჩაში, დავდივარ მძიმედ და...

ჩემზე უარესნი დამინახავენ

და დამცინავად გაეღიმებათ...

ო, მე არც თუ ისე მსუბუქი იერით

დავდივარ ქუჩაში, დავდივარ მძიმედ და...

შემხვდება ვიღაცა - მთლად სიცარიელე

და დამცინავად გაეღიმება.

რამ დაგაბრმავათ, ბატონებო?

ვიცოდე ნეტავ?

რამ დაგაბრმავათ?

იმან, რომ მხედავთ...