ტარიელ ჭანტურია - ცალმხრივი სიყვარულის ქება

სიყვარული! ცალმხრივი? -

ნაღდი სიყვარულია! -

მოზიარე არა გყავს -

შენი სიყვარულია...

ცალმხრივი სიყვარული

სიყვარულზეც მეტია! -

რა იქნებოდა ჩემი

სიცოცხლე და ცხოვრება -

მე რომ ის ღამეები

ტანჯვაში არ მეთია...

იმხელაა - გიკვირს, რომ

ერთ გულში ჩაეტია!

ისე, ერთგულებითაც

სხვაზე ბევრად მეტია!

იმ ორის სიყვარულზე

ორჯერ უფრო მეტია! -

რა სახსენებელია

ნესტანი და მედეა...

ბედი მისი, თუ ვინმეს

გაუმართლა ამ მხრივაც! -

ვისაც ცალმხრივად უყვარს,

ან ვინც უყვართ ცალმხრივად...