თინათინ მღვდლიაშვილი - ლექსები - მზეზე დახეთქილი ბროწეულები!..

შენ გიყვარს ჩემი პოეზიის უცხო რითმები,

ქართული სიტყვის სურნელება და სიალმასე...

"სამადლობელი" - ქარიშხალში განარითმები,

დედა ღვთისმშობლის სინატიფე და სილამაზე.

შობის ღამეა... შემოივლის თბილისს უფალი...

დაცემულ შვილებს გვანუგეშებს, ასგზის დაგვლოცავს...

ვდგავარ სარკმელთან, ვით სამყაროს ჭირისუფალი,

ამაღამ, ალბათ, ანგელოზმა შუბლზე მაკოცა.

შენ გიყვარს ჩემი პოეზიის სამკაულები,

როს ქართულ სიტყვას მწიფე შინდის ფერი ედება...

ლექსები - მზეზე დახეთქილი ბროწეულები,

მძიმე გზაწვრილზე აბჯარივით გეიმედება.