ფეხმძიმობა
გამოცანა
მე ვიცი ყოველგვარი საოჯახო მოწყობილებით შემკული საოცარი სახლი. შიგნით ბრუნავს წისქვილი, შიგნითვე არის სამზარეულო, სადაც დღედაღამ, განუწყვეტლივ მზადდება საჭმელი. სახლი სავსეა მრავალი შიდა დერეფნებით, და ამ დერეფნებში მარდი მოსამსახურეები მიარბენინებენ საჭმელს ყოველ კუნჭულში. ამ სახლშივე არის დაუღალავი ეკონომოსი, რომელიც არც დღისთ და არც ღამით ერთი წამით არ დაიძინებს, განუწყვეტლივ გააქვს რაკა-რუკი და ერეკება მარდ მოსამსახურეებს აქეთ-იქით სახლის სახლის კუნჭულებში, სადაც კი საჭიროა საჭმელი, სასმელი და სითბო.
ამ სახლში არის ვეებერთელა დარბაზი, სადაც თავისუფლად შედის სუფთა ჰაერი; არის აგრეთვე ორი პატარა, ნათელი, სახურავიანი ფანჯარა; ღამით ეს სახურავები იხურება, დღისით კი ღიაა. სახლში ცხოვრებს უხილავი მანდილოსანი. მისი ნახვა არავის შეუძლია, მაგრამ მთელ სახლს ის განაგებს და განაცხოველებს.
ამ მანდილოსნისათვის ირჯება ეკონომოსი, მისთვის ცდილობენ მარდი მოსამსახურეები, სწორედ ის იცქირება პატარა ნათელი ფანჯრებიდან და ასწევს და დასწევს სახურავებს. მანდილოსანი რომ ამ სახლიდან მიდის, ყველაფერი დუმდება: ეკონომოსი რაკა-რუკს ფიცხლად წყვეტს, მოსამსახურეები ზედ გზაზე შეშდებიან, სახურავები ეფარება პატარა ფანჯრებს და მთელი სახლი ჩუმი, ცარიელი და ცივი ხდება. მაგრამ სად მიდის მანდილოსანი? იქ, საიდანაც მოსული იყო - ზეცაში. ამ ქვეყანაზე იგი მხოლოდ სტუმარია და ცხოვრობს დროებით სახლში, რომელიც მისი წასვლის შემდეგ მტვრად იქცევა ხოლმე.
