მე მახსოვს დედის დალეული, სუსტი ხელები და ზედ ძარღვები, როგორც იის ლურჯი ფესვები: ფერგალეული და მომტანი ბედნიერების, დამდნარი, მაგრამ ჩემთვის თბილი, მოალერსენი.
მათი ძარღვები მკაცრ ბრძოლებში რკინად ქცეულან... მტერს მიკაფავდნენ, მილეწავდნენ მარჯვნივ და მარცხნივ, ზევით კი შიშით არასდროს არ აწეულან.
გზას რომ იკვლევენ, იკაფავენ წყვდიად ღამეში... მე ვიცნობ ხელებს, ქვეყნად შუქს და მზეს გაქცეულებს, თხუნელებივით შებუდრულებს ხელთათმანებში.
მესაჭეს, მჭედელს, მხსნელს და მთესველს, ხეს რომ აცურებს... მე ვიცნობ ხელებს, გაცრეცილებს და ფერშეცვლილებს და ღამეების თეთრად ტეხვით გადაქანცულებს.
რომლებმაც შექმნეს მონავარდე თანამგზავრები, გააპეს ნისლი, გადაკვეთეს ცისარტყელები და რაკეტები ცას შეაბეს, როგორც ზარები.
არ განმიცდია დიდი წუთი ბედნიერების, მაგრამ მათ ხელებს, ვიცი, ახლავს მთესველი მადლი, მეომრის ძარღვი და ალერსი დედის ხელების. |
ლექსები დედაზე • • • • • • ზურაბ კუხიანიძის პოეზია |