ალექსანდრე აბაშელი - სიმღერა

რად გინდა გული მგზნებარი,

თუ ქვეყნისათვის ურგი ხარ?

თუ მუდამ სხვათა მქებარი

შინ თვითონ არვის უქიხარ?

თუ არ გიგრძვნია აროდეს

გმირული საქმის ტრფიალი,

სამშობლოს რად უხაროდეს

შენი ამქვეყნად ტრიალი?

ჩვენი სიცოცხლე რა არი? -

ჩიტივით გაგვიფრინდება",

დილით მზიანი ცა არი,

საღამოს დაიბინდება.

რაზომც დარჩენა გვინდოდეს,

ჩვენს გზას წამიერ გავივლით.

ჩვენს ნაყვავილარ მინდორზე

სხვა გაიშლება ყვავილი.

დაგვრჩება მხოლოდ სახელი,

როგორც გუგუნი ფრთებისა,

როგორც მარადი ძახილი

სამშობლოს მაღალ მთებისა!