მედეა კახიძე - საქართველოში ბევრია

არის მრავალი გზაწვრილი;

ახალბედა თუ ძველი.

გზები წლებისგან წაშლილი,

თვალმისაწევად ძნელი.

ჩრდილები ახალთახლები

და მზის გამდნარი ხვავი,

თუ არ გინახავს, გახდები

ფერების უნახავი.

რაც ვძებნე სხვაგან სიმართლით,

ჩვენში ყოფილა თვითონ, 

ჩვენშია მზის და სინათლის

დაულეველი ხვითო.

ვისაც უგრძვნია მთის გულთან

უხვი სიუხვე ფერთა,

თავისი ფეხით მისულა 

სალაპარაკოდ ღმერთთან.

კიდითი კიდე გუგუნებს

სიმღერა მთებში თქმული,

საქართველოში ბევრია

მზე და კეთილი გული!