თედო ბექიშვილი - მუშაობა მთავარი

მუშაობა მთავარი

უკვე გაწეულია: 

ჩვენი კოხტა მთა-ბარი 

ლამის დაქცეულია!

ტყეში ჩიტი არ გალობს, 

წყალში თევზი არ ცურავს... 

სხვას ვის გადავაბრალოთ,

ჩვენ ვიშრომეთ კაცურად.

ამოვხაპეთ ძალუმად, 

არნახული შეტევით, 

ცხადადა თუ მალულად, 

გეგმის გადამეტებით.

შემართებით ჩვეულით 

საქმე აწყობილია: 

მთები - დანგრეულია, 

წყლები - აღობილია.

საქართველოს სხეული 

დაშლილ-დაყოფილია... 

მონაგარ-მიღწეულით 

ხალხი კმაყოფილია!

წარმატებით ვამრავლებთ 

სასახელო თარიღებს,

ხოლო მიწამ საბრალომ,

რა ქნას? ხმასაც არ იღებს.

მუშაობა მთავარი 

უკვე გაწეულია: 

ჩვენი კოხტა მთა-ბარი 

ლამის დაქცეულია!