ჯემალ ქათამაძე - ეს აჭარაა უპირველესად

შავ ზღვას უხდება ლომის ფაფარი,

კიპარისს ყელზე ეხვევა სურო

არც სამოთხეა და არც ზღაპარი,

მაინც რაც გსურდეს, ინატრე სულო.

მწვანე კონცხია თუ მწვანე გემი, 

ზღვა ნელა ღელავს, როგორც ჯეჯილი

შორს ციხისძირი კიაფობს ჩემი -

ბრძოლებში კალთა ჩამოგლეჯილი.

კლდიდან ამოქუხს წყარო-მირონი,

ნაპირს აწყდება ტალღა მაგარი.

ზღვა და ზღაპრული სანაპირონი

გამრჯე ხელებით ნაამაგარი.

მაგნოლიებზე სხედან მტრედები, 

მზე ფუნჯით სატავს მთებს და ველებსა.

თუ სადმე არის ბაღი ედემის - 

ეს აჭარაა უპირველესად.