გალაკტიონ ტაბიძე - ჰე, მამულო!

ჰე, მამულო! გრძნობა შენი მოვლისა

მარად ყველა ჩვენთაგანის ვალია.

სანამ გმირმა შენთვის სული დალია,

სთქვა: „სამშობლო, უპირველეს ყოვლისა!“

არმოშიშარს ქარისა და თოვლისა, 

ყოველ ჩვენგანს ურყევ მიზნად ექნება

მხოლოდ შენთვის თავდადების შეგნება:

მამულს გული, უპირველეს ყოვლისა!

მზე ჩაჰქრება ყველა სისხლისმწოვლისა,

მზე ამოვა ყველა დაჩაგრულისა,

წამლად იქნას ყოველ დაჭრილ გულისა:

გამარჯვება, უპირველეს ყოვლისა!