მუხრან მაჭავარიანი - საქართველო

ვისაც უყვარს საკუთარი სამშობლო და მინდორ-ველი,

ვინც არ უნდა იყოს იგი - ფინელი თუ ინდოელი,

ვინც გლეხია,

ვინც მუშაა,

ვინც სიმართლის მძებნელია -

საქართველო არ უყვარდეს - ყოვლად შეუძლებელია!

კიდევ უფრო, კიდევ უფრო  იღორძინე, საქართველო,

კიდევ უფრო ბევრი შვილი გამოზარდე სასახელო,

კიდევ ერთი რუსთაველი,

კიდევ ერთხელ აამღერო;

შენც იხარო -

ჩვენც გვახარო, -

გამხნევდე და გაგვამხნევო,

გევალება,

საქართველოვ!

შეგიძლია,

საქართველოვ!

გაგიმარჯოს,

საქართველოვ!