ტარიელ ჭანტურია - მიყვარს ქართულად

მიყვარს ქართულად, მძულს ქართულად,

ვმღერი ქართულად

მადლობა ღმერთს

ნებადართულად!

შანსი მქონია - არ მომირთხამს

ფეხი თათრულად,

ვზივარ და ფეხი ფეხზე მიდევს,

ეგეც ქართულად!

თარგმნეთ რუსულად, კი ბატონო

თარგმნეთ ფრანგულად,

მაგრამ მე მიყვარს, მე მძულს

მე მწამს, მე ვწერ ქართულად!

მე ყოვლად ქართველს

ყოველივე მიყვარს

ქართული,

ამიტომაც ვარ ქართველებთან

წელგამართული!