არჩილ სულაკაური - ქართული სიმღერა

ჯერ საქართველო, გიორგი,

ჯერ საქართველო ვახსენოთ,

რისთვისაც სული გვიდგას და

ქვეყნად რისთვისაც ვარსებობთ!

ვიდრე ჩვენს აგურს დავდებდეთ,

მიმოვიხედოთ გარშემო,

ჯერ საქართველო, გიორგი,

ჯერ საქართველო ვაშენოთ!

თავს სატკივარი არ მალავს,

რამდენიც უნდა დავმალოთ,

ჯერ საქართველო, გიორგი,

ჯერ საქართველო ვამრავლოთ!

გავუუკვდავოთ საწუთრო

ჩვენი სიცოცხლის ვადითო,

ჯერ საქართველო, გიორგი,

ჯერ საქართველო ვადიდოთ!

და სანამ სიტყვა წაგვცდება,

დავფიქრდეთ, რისთვის ვარსებობთ,

ჯერ საქართველო, გიორგი,

ჯერ საქართველო ვახსენოთ!