ირაკლი აბაშიძე - ათასჯერ თქმულის მიბაძვით

ეს ამერეთი, ეს იმერეთი

ხომ სულ აგივსე ხმებით, უთვლელით -

მაინც სიმღერა, ათასმეერთე,

მიმდევს, თან მიმდევს შენთვის უთქმელი.

ხომ სულ ვადიდე შენი სახელი,

შენი ხმაური, შენი მთა-ბარი -

მიუღწეველი, მოუნახველი

მიმდევს, თან მიმდევს სიტყვა მთავარი.

შენი მთა-ბარი, შენი ხმაური

ჩემი ხორცია, ჩემი სისხლია - 

მიმდევს, თან მიმდევს ის სიყვარული,

რომელიც შენთვის არ ამიხსნია.