გივი ჩიღვინაძე - ანბანთქება

               ა 

აელვარებს ალიონი

ალაგ-ალაგ ღრუბლის ფენას,

არწივებმა ადრიანად 

აღმა-აღმა იწყეს ფრენა.

                ბ

ბაიები, ბარდი, ბალბა, -

ბიბინებდა მდელო ბაღთან, 

ბუერებთან ნაკადულში

ბატი ჭუჭულებსა ბანდა.

                 გ

გაგვიფრინდა გნოლის გუნდი,

გადაევლო გაღმა გორებს.

გვრიტი გედებს გასძახოდა,

გუგულებმა გაიგონეს.

                  დ

დედულეთში დედაბოძთან

დედამ დასვა დათო დიდხანს,

დედაენა წინ დაუდო

და ანბანი წაუკითხა.

                  ე

ეძებეს ეკამ და ელომ

ენძელა ტყეში იმ დილით,

ეშმაკს ამსგავსეს ხის კუძი,

ეზოს მოადგნენ სირბილით.

                   ვ

ვაკეზე ვაზი ვახარეთ,

ვრცელი ზვარი გავაშენეთ,

ვენახს ვაზი, ვაზს მტევანი,

ვაჟკაცს შრომა დაამშვენებს.

                  ზ

ზურმუხტოვანი ზაფხული,

ზღვის სანაპირო მზიანი,

ზედიზედ წყალში ხტებიან 

ზაზა, ზეზვა და ზვიადი.

                   თ

თხილებთან თეთრი თიკნები

თითქოს თამაშით გართულან,

თან თრთოლვით უთვალთვალებენ 

თამამად მყეფარ ბათურას.

                    ი

იფნების იქით იელი,

ირემი მშვიდი იერით

იჩქარის შორი ტყისაკენ,

იქ ნორჩი ნუკრი მიელის.

                   კ

კორდზე კერკეტმა კაკალმა

კარგად მოისხა ნაყოფი, 

კოდი ავავსეთ, დავტოვეთ

კიდეც ციყვების სამყოფი.

                   ლ

ლაჟვარდი ლაღად ლივლივებს

ლამაზადა ფრენს მიმინო,

ლეღვის შტო ჩიტებს იფარავს,

ლოდთან ყვავილობს ღიღილო.

                      მ

მთები მწვანედ მოირთვება, 

მოსცილდება მუხას მუმლი,

მტერი ვეღარ მოგვერევა, 

მამულს კარგად თუ მოვუვლით.

                      ნ

ნიკო, ნონა და ნოდარი

ნეტავი რას აკეთებენ

ნაირნაირ ნერგებს რგავენ

ნარ-ეკლიან ნაკვეთებზე.

                     ო

ოლეზე ორი ოფოფი

ონავარ ბარტყებს ზრდიდა,

ოთხმოცდაათ დღეს დასჭირდა 

ორივეს საზრდოს ზიდვა.

                     პ

პატარ პატარა პეპლები

პირიმზეს თავს დაჰხარიან,

პაპუნამ ამ ლამაზ ყვავილს 

პეშვით აპკურა წყალია.

                     ჟ

ჟამით ჟამამდე ჟინჟღლავდა, 

ჟუჟუნა წვიმაც დიოდა,

ჟოლოზე ჟრუნი ჩიტუნა

ჟივჟივებდა და ჩიოდა.

                    რ

რა რხევაა რტოთა რიგის,

როგორი დგას რია-რია.

რცხილიანში რემა მირბის,

რაშთა რბოლა-გრიალია.

                    ს

საამო სიო სისინებს,

სათიბი თრთის და ღელავს,

სუყველას ლაღად აცეკვებს

სამყურას, სვიას, ლემას.

                    ტ

ტაროებით ტენის ტომრებს

ტოლს არ უდებს ტატო ტოლებს

ტეხენ სიმინდს, ჭრიან ჩალას,

ტყემლის ძირას ყრიან კონებს.

                     უ

უჩას უზანგ-უნაგირით

ურჩი კვიცი შეუკაზმავს,

უცებ ზურგზე მოქცევია,

უკან შემოუსვამს ზაზა.

                     ფ

ფუტკრებს ფართი ფუღუროში

ფიჭა უდევთ ფენა-ფენა

ფერად ფერად ყვავილებზე

ფუსფუსებენ მინდორ-ველად.

                     ქ

ქარში ქანოაბს ქორაფი, 

ქარაფთან ქრიან ქორები, 

ქედებზე თოვლი მოსულა,

ქათქათებს თეთრად გორები.

                   ღ

ღვივის ღუნღულა ღრუბელი,

ღებავს დაისი ცის კიდეს,

ღობესთან მაღალ ტყემალზე 

ღაბუა ჩიტი ჭიკჭიკებს.

                    ყ

ყელყელაობს ყვავილნარი,

ყანის პირას ყრია ძნა,

ყიყლიყოო, მამალაყინწამ

ყველა გამოაღვიძა.

                    შ

შავი შაშვების შვილებმა

შვრია აკენკეს ყანაში,

შინდის შტოებზე შეფრინდნენ

შექმნეს სიმღერა-თამაში.

                    ც

ციცქნა ციყვებმა ცაცხვებში

ცხრაკარა ბინა გამართეს,

ცხრაგვარი ხილით ავსებენ

ცარიელ გოდორ-კალათებს.

                      ძ

ძეწნების ძირას ძროხა ძოვს,

ძაღლს მიულულავს თვალები,

ძიძგილაობენ ლეკვები

ძვლის გამო ძილგამკრთალები.

                      წ

წამდაუწუმ წვრილად წვიმდა,

წიფლიანში მოცვი მწიფდა,

წყნარად იდგნენ წიფლის ხენი,

წვერი ცისთვის მიეწვდინათ

                      ჭ

ჭივჭავები ჭიკჭიკებენ, 

ჭვავს კენკავენ ჭალაში,

ჭრიჭინებიც შეაშინეს

ჭინჭრებსა და ჩალაში.

                      ხ

ხევგაღმა ხარობს ხეხილი

ხურმა, ხურტკმელი, ქლიავი...

ხან აწვიმს, ხან მზე დაჰნათის,

ხან აშრიალებს ნიავი.

                      ჯ

ჯიშიანი ჯიხვების ჯგრო

ჯიქურ ხტება კლდიდან კლდეზე,

ჯახაჯუხი ისმის რქების 

ჯანღიანი მთების თხემზე.

                     ჰ

ჰერიოდა, ჰოოპუნა,

ჰარალე და ოროველა -

ჰანგებს ვმღერით ჰაეროვანს,

ჰარმონიის ისმის ჟღერა.