მაია კობაიძე - ფიფქის ამბავი

თოვლის ფიფქი ფარფატელა

ჩამოფრინდა ამ დილით.

ასე გვითხრა: - სტუმარს უნდა

მოვუმზადოთ სადილი.

ძველი წელი მიბრძანდება                                

მალე ახალს ველიო                                            

ზეიმი გვაქვს დიიდზე დიდი

სუფრაც გვინდა გრძელიო.

დაუძახა სხვა ფიფქებსაც;

დახმარება მინდაო,

თეთრი სუფრა მომიქარგეთ 

ლამაზი და წმინდაო.

მერე ფიფქმა მეც მომმართა:

- ჩემო კარგო მარიამ, 

შენს მეგობრებს: ლაშას დათოს

შეეხვეწე ძალიან,

მოძებნონ და მორთონ ტყეში 

ნაძვი დიდი, მაღალი,

ამ საქმეში დაიხმარონ 

გიორგი და თამარი.

დატრიალდნენ მეგობრები

გამოფრინდნენ ფიფქები

საზეიმოდ მოემზადნენ                                   

შაშვები და ჩხიკვები.

გაიშალა თეთრი სუფრა

ფიფქებით მოქარგული,

დაალაგეს ტკბილეული,

ნამცხვრები მოშაქრული.

მალე გაჩნდა ტყეში ნაძვი

ნაირფერად მორთული

ბოლოს სპილომ ჩამოკიდა 

მოსართავი ხორთუმით.