ნუგზარ კობერიძე - აპრილი

მთებზე გაბმული ცისარტყელას

სიმები ჟღერენ,

მღერის ცვრიანი ცა და მიწა,

ბუტბუტებს ღელე,

გაუღეღიათ სავსე მკერდი

ბროლის ნამქერებს

და მზე გაცვეთილ ზამთრის ქურთუკს

მწვანით აკერებს.

ვდგავარ მთაზე და წვიმის ღრუბელს

ვუგზავნი ღიმილს,

მიწის ფილტვებში უხმოდ რეკენ

სიცოცხლის ზარებს,

ადგაფუნებულ სისხლძარღვებში

აპრილი ყივის

და გაზაფხული დასათესად

გამოაქვთ ხარებს.