თამარ წამალაშვილი - მღერის გაზაფხული

სიყრმის მოგონებებს ჭირხლი შეერია...

დროის შემოდგომას ვუმზერ დაზაფრული...

- გული სიჭაბუკეს რად ვერ შეელია?...

ჩემი სარკმლის მიღმა მღერის გაზაფხული...

ისევ აბრიალდნენ მზეზე აპრილები...

ისევ მომატარეს ფეხით კიდით-კიდე.. 

ფიქრის ქარავნების მომსდევს არილები...

- უკვირთ... - კვლავ ბავშვივით, რატომ გავეკიდე...

სტვენით თავს მევლება მოლაღურთა მარში...

მზერით მივეფერე ფერით ნაირგულებს...

ნატვრები ავკინძე სურვილების ქარში...

მძივად შევაბნიე წელთა თაიგულებს...

წლების ხსენებაზე სევდა მომერია...

ვერც მე დავიკვეხნი თავის დამეტებით...

სადღაც იმედების ზაფხულს, რომ ელიან...

სადღაც, ამ იმედებს ათოვს გამეტებით...

სიყრმის მოგონებებს ჭირხლი შეერია...

დროის შემოდგომას ვუმზერ დაზაფრული...

- გული სიჭაბუკეს, რად ვერ შეელია?..

ჩემი სარკმლის მიღმა მღერის გაზაფხული!..