პლატონ ასანიძე - აპრილი

ვდგევარ ბაღში... გული არ გრძნობს სიმარტოვეს...

მხოლოდ მიკვირს - ტყემლებს რად აქვთ ფერი მკრთალი?

ან მხარგაშლილ მობრიალე ატმის რტოებს

ვინ შეუნთო გასაოცრად ცეცხლის ალი?

ირგვლივ ხენი უშფოთველნი დგანან მშვიდად...

მე მაოცებს ეს ცეცხლი და თოვლის გროვა...

თუ ცეცხლია - მარტო ატმებს წაეკიდა?

თუ თოვლია - მარტო ტყემლებს დაათოვა?

სხვა ნერგები თვალის სეირს ესწრებიან?

თუ რა არის? რა სიმწვანე ფარავთ მხრებზე?..

- აპრილია! თურმე აპრილს შესძლებია:

ტყემლებს თოვლით, ატმებს ცეცხლით ააფეთქებს!