მურმან ლებანიძე - სურათი

უკვე ჩავლილა შემოდგომა წითელ-ყვითელი,

ტოტზე შერჩენილ მჩუტე ნიგოზს ნიავი არხევს,

კაკლის ხე შუკას გადმოჰყურებს შიშველ-ტიტველი,

გდია ჭოლოკი, 

ჩაუვლიათ სკოლისკენ ბალღებს.

თავს დასტრიალებს ბეღურების გუნდი ნალიებს,

მშვიდობა ირგვლივ, გარინდულა ყანაც და ტყეცა,

ჩლიქის ნადგამში ნაწვიმარი წყალი დალიეს

და, როგორც წესი,

მიაჩერდნენ ქათმები ზეცას.

ხვალ თუ ზეგ მოთოვს, ჩაჰკირკიტებს დიდედა გოდორს,

ალბათ ამანათს გაუგზავნის ბავშვებს ქალაქში...

ჭრელი გოჭები ჭურისთავზე ქექავენ ფოთოლს

და ხეჭეჭური

გაჩეჩქვილი გდია ტალახში.