რაინერ მარია რილკე - შემოდგომა

მთარგმნელი: ვახუშტი კოტეტიშვილი

* * * * * * *

ფოთლები ცვივა, თითქოს შორით მომწყდარან იმედს.

თითქოს ჭკნებიან შორეული ზეცის ბაღები.

ცვივიან ცივად, უგუნებოდ და ხელაღებით.

და ვარსკვლავთაგან ღამეული ზეცის თაღებით

სიმარტოვეში დედამიწაც ეშვება მძიმედ.

ყველანი ვცვივით. ხელიც, როგორც ფოთოლი ხმელი

ვარდება. ხედავ? - საერთოა ცვენა და ბარდნა.

მაგრამ არსებობს ერთადერთი, ვინც ყოველ ვარდნას

უკიდურესად ნაზად იჭერს თავისი ხელით.

მთარგმნელი: თამაზ ჩხენკელი

* * * * * * *

ფოთლები ცვივა, ცვივა თითქო ყრუ სიმაღლიდან,

თითქო ჭკნებოდეს ცის უფსკრულში მყუდრო ბაღები.

ფოთლები ცვივა უარისმთქმელ ხელის ჩაქნევით.

და ყოველ ღამე დედამიწა ვარსკვლავთ სახლიდან

მძიმედ ვარდება უდაბური გზის მისაგნებად.

და ჩვენც ყველანი ძირს მოვცვივით, ვით თოვლის ბარდნა,

ხმელი ფოთოლი, დედამიწა, კაცის ხელები, -

და მხოლოდ ერთი დგას უძრავად, - მას ყველა ვარდნა

ხელში უჭირავს უსასრულოდ ნაზ მოფერებით..