ჯანო გიორგაძე - დეკემბრის ღამე

დეკემბრის ღამე მთებს იქით მიწვა,

მომაკვდავივით გაფითრდა ზეცა,

ყვითელ ფოთლებში დაიხრჩო მიწა

და ნისლი ქედზე გადაიკეცა.

სადღაც მიილტვის ღრუბელი ჩქარი,

აღარ ანათებს მთვარე მაღლიდან,

კიდევ კარგი რომ არ დაჰქრის ქარი,

თორემ ამ ჭადრებს ტრფობით დაღლიდა.

მთისკენ მიილტვის ღრუბელი ჩქარი,

თითქოს უბელო შავი რაშია,

ჭაღარა მთებო, გაშალეთ მხრები -

გარიჟრაჟია! გარიჟრაჟია!