საულვაშეზე გაუჩნდებათ ღინღლი და მალე საიალაღოდ გაიწევენ, როგორც ხარები... დედის ნაფერებ, ნაალერსებ ცეცხლიან თვალებს სხვისი უბისკენ გააპარებენ. თითქოსდა მართლაც უნახესო მათ გასაღები. მამისგან ნასწავლ სადღეგრძელოს, ტოლებთან, ლხინში, თავის ნათქვამად გაასაღებენ. მათი გაფრენით ვინ იხარა, ან ვინ ეწამა... დაიკოს ნატიფ თეთრ ხელებით დავარცხნილ ქოჩორს სხვას მიუშვერენ გასაწეწავად. თუმცა თვალები არასოდეს არ ხუნდებიან. და ბოლოს მაინც, ნაომარნი, დაღლილნი გზებით, მშობელ კერასთან დაბრუნდებიან. და ბალღებივით ყრუ ქვითინი აუვარდებათ. მაგრამ დაგმანულ, ცივ ფანჯრებზე, შხამად თუ წამლად, იკანკალებენ შავი ფარდები. დანამულ თვალებს შეავლებენ ეზოს ცირცელებს... ისევ იტყვიან მამის ნათქვამ სადღეგრძელოებს და დედას ისევ ცოცხალივით დაიფიცებენ... |
ლექსები მამაზე • • • • • • ზურაბ კუხიანიძის პოეზია |