იოსებ გრიშაშვილი - აღმზრდელს

თუ ბავშვების სიყვარულმა 

მე გამხადა ფაქიზ მგოსნად, 

შენ სხვა კუთხით ნორჩ თაობას 

ემსახურე პატიოსნად.

მერხებიდან გაისმოდა

შენი სიტყვა გამყივარი, 

რომ გაგვეგო ბავშვის სულის 

ყოველგვარი სატკივარი.

ოცდაათი წელიწადი

გაატარე ასე წმინდად

და ნაყოფიც ხომ მოიმკე, - 

სხვა რა გინდა? სხვა რა გინდა?

გადახედე შენს გაზრდილებს, 

ყველა ლხენით შემოგცქერის -

რიგი გლოცავს, რიგი გაქებს, 

რიგი ცეკვავს, რიგი მღერის.

დღეს დიდებიც მოგძახიან: 

საყვარელო, გაიხარე;

არასოდეს დაგივიწყებს

მადლიერი ჩვენი მხარე!