მარტივი და რთული სიტყვები

შედგენილობით სიტყვები ორგვარია:  მ ა რ ტ ი ვ ი  და  რ თ უ ლ ი.

მ ა რ ტ ი ვ ი ა  სიტყვა, რომელიც ერთი ფუძისაგან შედგება. მაგალითად: კაცი, ქალი, წიგნი, მებაღე, სვანეთი, საქართველო.

რ თ უ ლ ი ა  სიტყვა, რომელიც ორი ან მეტი ფუძისაგან შედგება. მაგალითად: ვაჟკაცი, ცისკარი, ქინძისთავი, თავზარდაცემული, თავპირდამტვრეული, ხელფეხშეკრული, დედ-მამა, და-ძმა, ცოლ-შვილი...

სავარჯიშო 1. წაიკითხეთ მაგალითები და აღნიშნეთ, რამდენ-რამდენი ფუძისაგან შედგება ქვემოთ დასახელებული რთული სიტყვები:

მამიდა. დედამიწა. წყალწაღებული. შავთვალწარბა. თავშალწამოსხმული. გულკეთილი. შუბლგახსნილი. თავქუდმოგლეჯილი. გულხელდაკრეფილი.

სავარჯიშო 2. შეადგინეთ რთული სიტყვები ქვემოთ დასახელებული სიტყვებისაგან და ჩაიწერეთ რვეულში. რთულ სიტყვას გაუსვით ქვეშ ხაზი.

ნ ი მ უ შ ი 1. პირი, ნათელი: პ ი რ ნ ა თ ე ლ ი.

ნ ი მ უ შ ი 2. თავი, შალი, დახურული: თ ა ვ შ ა ლ დ ა ხ უ რ უ ლ ი.

ერთი, გული.

თავი, შიშველი.

შუბლი, გახსნილი.

გული, მართალი.

ხელი, პირი, დაბანილი.

თავი, გზა, აბნეული.

თმა, წვერი, ულვაში, გათეთრებული.