ჯემალ აჯიაშვილი - ქუთაისი

ფაზისის ტალღა, ფანფარები, რკინის ბელადი 

დღე გუშინდელი, დღევანდელი - ფიქრად ავკეცე, 

მოჩანს ზარი და სამლოცველო, მოჩანს გელათი 

და კოშმარებში გახვეული ჩვენი სამხეცე.

სულიკოს ეშხი, მგოსნის ლექსი, ლექსი ჟღერადი, 

ქალდეის ჩრდილი ირეკლება ღრუბლის სარკეში, 

და ქალებს ჩანგლავს დაშაქრული იზაბელათი 

სვანიძის ბიჭი - მექალთანე და მოანკესე.

იცვლება კადრი - ფიქრის ბაღი, ბაღში ბორხესი, 

ბორხესის იქით - მოწამეთა და რიონჰესი.

დროვ წარმავალო, შესართავებს თავსაც შეურთავ,

ჩავცქერ წიაღებს, წიაღებში - უძრავ ფარაონს, 

ბორგავს მდინარე რომელიღაც ათასწლეულთან 

და მდინარეში აიეტის ლანდი ქანაობს...