ჯანსუღ ჩარკვიანი - ქუთაისი

სიყვარულს ჰგავს 

ეგ შენი ცა კრიალა,

დალოცვილი,

ალბათ, უფალს თუ ჰყავდი.

ქუთაისო,

მარტო ჯანსუღს კი არა,

ჩემს საყვარელ 

დიდ აკაკის უყვარდი.

სიყვარული

არის, განა, იოლი, 

ანდა, ვინმე

უფრო კარგს რას გეტყოდა, 

შენ გეტრფოდა

დიდი გალაკტიონი, 

გალაკტიონს

შენი გული ეტრფოდა!

სიყვარულით

სად მივიდე, კიდევ სად, 

რაც შენ გიყვარს,

გულთან მარად მიმაქვს ის, 

ჯაჭვის ხიდით

მივალ ბაღის კიდესთან, 

ვადღეგრძელებ

ჩემს საყვარელ ქუთაისს!