ვახტანგ გოგოლაშვილი - ქართული ავტომობილი

გახარებული მე იმ დღეს ვნატრობ,

მე მინდა დავტკბე ნატვრის ახდომით,

იმერეთიდან ქართული ავტო,

რომ გაიჭრება ვეფხვის ნახტომით.

ხარ-ირემივით შეჰყვირებს ქუჩებს,

გაახალისებს ყველა მისიანს,

შეხედავს ბავშვი, შესძახებს უცებ:

- ქართული არი, ქუთაისია!

შეირხევიან და შეკრთებიან

გზებზე დაყრილი ალვის ჩრდილები,

წნელის ღობეებს მოაწყდებიან

თავსაფრიანი ქალიშვილები.

გაიწევიან განზე ტანფართოდ

ორღობეები დაღობილები,

ბერ-პაპა დინჯად ჩიბუხს გამართავს,

ჩაეღიმება კმაყოფილებით.

გახედავს გორებს, უგზოს სრულიად,

მერე კეთილი ფიქრი დაფარავს:

- რაც უნდა იყოს, იმერულია,

იქაც ააღწევს ჩვენი მანქანა!..

გახარებული მეც იმ დღეს ვნატრობ,

მინდა, რომ დავტკბე ნატვრის ახდომით,

იმერეთიდან ქართული ავტო

გამოიჭრება ვეფხვის ნახტომით.