ჟუჟუნა შაინიძე - ბათუმს

მე ახლა ისე შევალ წვიმაში

როგორაც გულში შემოდის დარდი,

თუ ბათუმივით მე მიყვარს წვიმა,

ხომ შეიძლება მასაც ვუყვარდე.

ხომ შეიძლება გახსნას ცის კარი,

მზე პირს იბანდეს, ისე იწვიმოს,

და მერე როცა გადაიკარებს

ცისარტყელაში გამოიბრწყინოს.

გამოიბრწყინოს დიად ცის ნებით

მორთოს ქუჩები იაგუნდებით

და თოლიების ფრთათეთრ გუნდებით

შექმნას ბათუმმა სხვა ლეგენდები...

ო, რა სილაღით დავსერავ სერებს,

ავყვები ლაჟვარდს – ჩიტს ფრთახატულას,

მზეწვიმა ლამაზ ჰანგებს იმღერებს

რომ ფრთა გაშალოს ჩემმა ბათუმმა.