ტკბილად ნაქებო კახეთო - ხალხური პოეზია

ტკბილად ნაქებო კახეთო

დიდო ალაზნის ჭალაო,

ირემო იალაღზედა

ივრის პირებზედ ჩალაო!

ბარდში მძრომელო ხოხობო

შენ ტურფა ხარისთვალაო.

შენი მინდვრების ჭირიმე

შენზედ ირმების ფარაო!

თვალები გიგავს მაყვალსა,

ლოყებიც ვაშლის ნათალსა,

ენით შამაუღუღუნე

ერთხელ ნუ მეტყვი უარსა.

მიყვარხარ ტკბილო კახეთო,

დიდო ალაზნის ჭალაო

შირაქო ცხვრების დედაო, 

ზედ ჯეირნების ფარაო.

ალაზნის ტალღამ გაკურთხა,

იორმა პირი გბანაო

ვერ მოგერია დუშმანი, 

თუმც ბევრჯერ მოგეძალაო.

ქვეყანა შემოვიარე,

ვერ ვნახე შენისთანაო.

ერთიან საქართველოის 

დაუშრეტელო ძალაო.