თამარ ბოლქვაძე - იქნებ, წვიმიდან მოვიდეს ვინმე...

დაუკრა წვიმამ სევდის კლავიშზე,

მინაც წვეთებად დამსხვრევას ითხოვს.

ერთად მოვიწყენთ ალბათ სამივე,

სარკმელი, მე და ოთახში სითბო...

წვიმის ფეხის ხმას გავყევი გარეთ,

ღამის სიგრილე სავლებად ვივლე.

ოდნავ თვალღია დავტოვე კარი,

იქნებ, წვიმიდან მოვიდეს ვინმე...

წვიმას ფეხდაფეხ მივყვები უკან,

გუბეები კი გუგებს ხურავენ.

სევდის კლავიშზე კვლავ წვიმა უკრავს

და თავჩაქინდრულს ჰგავს სახურავი...