ელგუჯა უძილაური - ისევ მარტი და ისევ წვიმა

ეხ, ისევ მარტი და ისევ წვიმა,

წვიმის წვეთებში ფიფქები თოვლის,

იელვებს - ქრება ქარსა და ნისლში

მაგ თვალთა მზერა - ცის ლურჯი ბროლი.

ჩემი ცხოვრება - წამების ჯვარი,

ძვირფასო, ისე დასრულდეს ლამის,

არ მღირსებია ღიმილი შენი -

მარადისობა ნანატრი წამის.

მე სივრცეები მიხმობენ შორი,

ოღონდ გამომყევ, ოღონდაც მენდე,

ცხრა მთის, ცხრა ზეცის, ცხრა ზღვის გადაღმა,

სალოცავ ტაძარს ვაშენებ დღემდე.

წავიდეთ, აქ კი იტიროს მარტმა,

გადავიქროლოთ ლაჟვარდი ვრცელი,

ხომ შეიძლება ბედნიერება

ვპოვოთ იქ, სადაც არასდროს ველით.

ეხ, ისევ მარტი და ისევ წვიმა,

წვიმის წვეთებში ფიფქები თოვლის,

იელვებს - ქრება ქარსა და ნისლში

მაგ თვალთა მზერა - ცის ლურჯი ბროლი.