მიხეილ ქვლივიძე - იწვიმებს ასე

იწვიმებს ასე. დაცხრება სანამ,

ხედავ - ხეებიც თავდაღმა დარგეს.

ვიღაც მოცლილნი ქუჩაში დგანან,

შოლტებს ურტყამენ ფილაქნის სარკეს.

წვიმს უმოწყალოდ, უგულოდ, ისე, 

ძაღლს არ გააგდებს პატრონი გარეთ...

შენ - მეოცნებე სტრიქონის სხივზე -

"თქვით რამე ლექსი"... - ამბობ მწუხარედ.

მერე ოცნებით წამწამებს ნაბავ,

გესმის სიმღერა ქარის და წვიმის...

და ძლივს იკავებს სულმოკლე კაბა

მუხლისთავების ვარდისფერ ღიმილს.